الـغــربــة
يمه ... الغربة وفرقاك ملتمه
دمعة العين هذي ... مالها داعي
يابعد راسي انتي ليه مهتمه
الوجع لي سواة الناي للراعي
آخر أخباري ... الذمه هي الذمه
والوصايا هذيك تقدي شراعي
مابه الا السواد يحاود اليمه
ولا به الا البياض اللي ورا أضلاعي
وأشعل ما يفارق ليل حضن امه
وأخضر كل صبح من أول أتباعي
يتعب البرق ما أتعب النظر يمه
وانشديهن بعد ما قلت أطماعي
أنجبن لي عـــروسة حلم أضـــمه
أو بعد توها تشرب عطش قاعي
واذكري كيف كان العود ابو عمه
ايتعلى صهيله وأرخي أسماعي
امنياتي بــدرب ودي أتمــــه
آخره صعب .. وأصعب منه مرجاعي
يوم كلن فزع له خـاله وعـمه
يكفي اني وردت العد .. بذراعي
أرفع الراس بين الروس ما همه
وأتباهى وأنا الغرقان بأوجاعي
يمه.. الحر طبعه يعشق الـقمة
وأنتي اللي فطمتيني على أطباعي
الهواء دام راسي حي ويــشمه
والله اني لاسـوق هنـاك ذعـذاعي
غربة تلوي ذراع أشجع الخمه
لا تخافينها لو تقـلب أوضــاعي
يمكن تبعثر الرجـال وتـلمـه
بس !! بدري عليها تلوي ذراعي
.....................................
بــغــداد
عساها فاتحة بـرد وسـلام وخاتمـة و قَّاد
على دار السـلام الله يـروّع مـن بروّعهـا
حضارة سومر وبابل قبـل تشريفـة الميـلاد
عروق الرسل والعلم واهل الشعـر وروايعهـا
هوى سيف الله المسلول يـوم السيـوف حـداد
مساري سربة ٍ كـان المثنـى فـي طلايعهـا
عروس ٍ زفها المنصـور والدنيـا لهـا سجـاد
ودلعهـا الرشيـد الله عليهـا يــوم دلعـهـا
بدت بالسندس اللي يهوس الخـلان والحسـاد
وكثر ماهزها التاريخ مـا اهتـزت مرابعهـا
بقت خضر ٍ مرابعها بقت تنجـب لنـا أمجـاد
بقت بيض ٍ صنايعهـا بقـت سـود ٍ وقايعهـا
ورى ما تستميت اقلوبنا معهـا وهـي بغـداد
ياكبر العـار لـو مـا تستميـت قلوبنـا معهـا
عليها الله وامان الله الـى ذرات زيـن ابـلاد
هجد صوت القنابـل جنـب تهليلـة جوامعهـا
دهاها من ورى الحملات ليل ٍ لو نقص يـزداد
أهلنـا فـي مدامعهـا واهلهـا فـي مطامعهـا
هل الحرية اللي لا غشى اصحاب البيوت ارقاد
تفرق بينهـا مـن دويـة الهـاون مضاجعهـا
هل الحرية اللي بعدها صاروا بنـات الضـاد
ينـوش المعتـدي حشمـة ملابسهـن ويرفعهـا
هل الحرية اللي قصـت أجنحـة أكثـر الأولاد
مادام ايدينهـا ماترفـع اثنيـن ٍ مـن أصابعهـا
تعودنا على حرق النسل والحـرث والأصفـاد
تعودنـا علـى نــار ٍ يطفيـهـا مولعـهـا
يبس بكفوفها إلا غصن زيتون ٍ وكمـا المعتـاد
عناقيـد الهدايـا جاتنـا مـن كـف صانعهـا
عسى المقبل مثل صيحة ثمود ومثل صرصر عاد
عشان أهل البيوت الخاربـه تبـرى مواجعهـا
ألا وين المراكب سايره في حضـرة الـرواد ؟
عساهـم للدوايـر ليـن تدرجهـم منافعـهـا
مصير امصار و اجيال وزمن وجموع بيد افراد
لها التاريخ بالمرصـاد وان خانـت ودايعهـا
محبتنـا عـداوه والقلـوب قريبّـات بـعـاد
بعـد مـا نصنـع الكذبـه نصدقهـا ونتبعهـا
خذتنا العنتريات الله يبيـح مـن ابـن شـداد
وضعنا بالخطب ليت الخطب نقـدر نضيعهـا
تواعدنا مع الوحدة وصرنـا نخلـف الميعـاد
مذاهب وانظمه واحزاب مـن يقـدر يجمِّعهـا
تصهْيَنْ دم نـاس ٍ طايريـن بعجـة الأوغـاد
تصاغرنا مثل ماستصغر الكرسـي مراجعهـا
أخيرا : كم بقى طاغي وكم باغي وكم جـلاد؟
وكم لص وكم أصنام وكم أوهام ٍ نصارعهـا؟
وكم صورة تظن الروح والدم أغنيه وانشـاد؟
وهـي كـل ٍ هنـاك يدوسهـا والا يقطّعـهـا
لعـل الليلـه اللـي جابـت الكابـوس ماتنعـاد
وبسم الله علـى بغـداد مـن شـي ٍّ يروّعهـا
.................................................. .
يـمّـه
يمه اذنبت ونزحت مـن العشيـره
وان تمنو توبتـي مانيـب تايـب
مابي لدنيـا الغناديـر اي سيـره
طايح من عام الاول في مصايـب
يمه اللي حب لـه طفلـه صغيـره
ويش يسوي لاغدا فيهـا طلايـب
طفلـةٍ ماكانـت بحبـي جـديـره
بس كانت غير عن كـل الحبايـب
كنت اسميها العنـود المستذيـره
ليت اهلها العام سموهـا عجايـب
كنت اجيها مثل الامطـار الغزيـره
كنت اضيع بجوها مثـل الهبايـب
وادعي الله هي متى تصبح كبيـره
تفهم اشلون المكان يصير ذايـب
ان تغنت تصبح الطرقـه قصيـره
وان تغلت تصبح جروحي عطايب
صنتها مثل البحر لابعـد جزيـره
ماتركت علومها لاهـل الركايـب
ديرة ماهـي بهـا ماهيـب ديـره
لو ثراها عشب واعلاها سحايـب
يمه اتحبيـن طايلـة الضفيـره؟؟
اااه والله ياعليها اشقـر ذوايـب
قالت ان جا الراس شايب فيه خيره
قلت يابنت الحلال الـراس شايـب
قالت الا الحب وشهو وش مصيره
قلت انا استاهل وانا كل السبايـب
ماجزا اللي حب له طفله صغيـره
غير قبر و ضحكها فوقه نصايـب
.........................................
غـــادة
جيت يا كثر السوالف والقصايد
الدلال مبهره لعيون غاده
جيت اسمرها واحط لها وسايد
من شجون قتلها للبرد عاده
جيت اغني والغلا كله ودايد
عل ذيك النار ما تصبح رماده
جيت ابي من وصلها جروح جدايد
القديمه ملها الليل وسواده
مثل ما ملت عتيقات القلايد
وجيت البسها من اشعاري قلاده
غيرها ما ابي رخا وقت الشدايد
ولا تبي لحدن بعاشقها شهاده
ان رظت ما اظن يرظي الناس كايد
لو تظايق ظاع مفتاح السعاده
كم لقيت اللي لقيت من النقايد
من نصيب طولت كبوة جواده
كم قظى ليلي وانا اطارد شرايط
الدموع لحاف والهاجس وساده
لا عند تحنان ولا الصبر فايد
قلت اسوق الدرب يكفيني جلاده
وجيت اصب الشوق يوم الشوق زايد
عل خاطرها خذا منه مراده
والا انا لي تالي اللقيا عوايد
قهوة من جمرها سكر زياده
....................................
يــابـوي
يا بوي أنا من ضوّك أشعلت ضوي
والله مــا تفـنـى ولــو كـنــت فـانــي
شربـت علمـك فـي مـراحـل نـمـوي
حتـى قـوى عـودي وغـنـى لسـانـي
تذكـر ضنـاك الحالـم .. اللـي ينـوي
صــار أكـبـر منـيّـة نـوايـا وأمـانـي
ياليـت عمـرك طـوّل وعشـت جـوي
وتشوف كيف أنجبت لك عمر ثانـي
عشـقٍ علـى حبـل الـوريـد متـلـوي
لهـوايـة التحلـيـق وحــدي خـذانــي
ما ضقت كم باكـر وأنـا أقـول تـوي
هـــذا زمـــان الـغـيـر ولا زمــانــي
ودي تــحــدّت هـالـنـجـوم بـعــلــوي
دام الـثـرى يـحـلـم بـحــزة طـمـانـي
مـن لا دخـل بـيـن الـرجـال متـقـوي
ما ظمنتي يصهل صهيـل الحصانـي
واللي على جـال الضلـوع متطـوي
تبـاشـري بمـفـارقـه يـــا المـحـانـي
والله لا سوّي .. ثم أسوّي وأسـوّي
ولا فــلا بـاسـمـي فـــلان الـفـلانـي
ماتـوا عـداي وصـار وقتـي عـدوي
لا بــو دقـايـق سـاعـتـه والـثـوانـي
أنــا عـلــى ذاك الـمـكـان مـتــروي
بــس الـوعـد لا قـلـت هــذا مكـانـي
.........................................
المــقـابــر
في مكان تفاخر فيه روس النصايـب
و امتلت من عظام الناس فاضي قبوره
كل شي يتراجف فيه حتـى الهبايـب
والذهايب توارى والنصايـب فخـوره
وقفت بي قدم رجلي وكلـي عجايـب
والبكا حولي اسمع له تمرد و ثـوره
لين جاء واخجل عيون تودع حبايـب
مؤمن جفف الدمع بحديـث و سـوره
عن يميني بيوت السابقين والذهايـب
وعن يساري بيوت اللاحقين محفـوره
اسمع اصغر ذنوبي كنه يصيح تايـب
والقدم ما نشدت بموقفه عن شعـوره
واذكر انه تشره لحظه وكـان هايـب
قلت خل الطواري ما طلبتـك مشـوره
دامها جت من الله مرحبا بالمصايـب
لو ثقل حمل نفس المسلم اللي صبوره
جيت اشيل الجروح المشرقات العطايب
طيب الله ثرى اللي فارق العين نـوره
ما ركزت النصيبه واعتلت راس شايب
كود ابـادّل ذاك القبر لا جيـت ازوره
عل ما تبخل بماها عليـه السحايـب
كودها تستر اطراف النصيبه زهـوره
كل حزن ملا الدنيا على القلب ذايـب
وانقلي يالجروح الحمل لو زاد جـوره
كنت اعزي مجاريـح بعـاد وقرايـب
واترك الخاطر لعيني تجبـر كسـوره
تغرف الحزن وتصب العباير صبايـب
وان خلص دمعها لعيون ابوي معذوره
شايل صورته في البال لو كان غايـب
ليته اللي يشيل لشخصي اليوم صوره
كان لي ظن في صغري ولا هو بصايب
احسب ان القبور من الحياة مهجـوره
عل قبره نعيـم وصالحاتـه سبايـب
هي عزاي بـوادع مـودّع جـاه دوره
...............................................
الإهداءات
02-07-2008, 10:06 PM
اشعار من ديوان الشاعر ناصر القحطاني ( شاعر الاندلس ) 
العرض العادي
